Жұлдыздардың танымалдыққа дейінгі өмірі әрдайым қызық, әсіресе медиа тұлғалардың жанкүйерлері үшін. Фанаттар кумирлерінің өнер жолына қалай келгенін білуге құмар. Harper’s BAZAAR Kazakhstan шоу-бизнес өкілдерінің жастық шағына шолу жасап, олардың бүгінгі күнге дейінгі өзгерісін көрсетпек. «Жұлдыздар танымалдыққа дейін және қазір…» немесе «До и после» айдарының жаңа кейіпкері – кино және театр актері Ермек Шынболатов.
Ермек Шынболатов – қазақстандық киноиндустрияда соңғы жылдары жарқ етіп көрінген жаңа буын өкілдерінің бірі. Таланты, экрандағы кәсіби ойыны және образға терең ене білу қабілеті оны қысқа уақыт ішінде көрерменге кеңінен танытты. Актер тек кино әлемімен шектеліп қалмай, театр сахнасында да өзін жан-жақты қырынан көрсете білді. Сахнадағы тірі эмоция мен экрандағы ішкі драманы ұштастыра алған Ермек кәсіби деңгейі жоғары актер екенін дәлелдеп жүр.
Өнер жолына саналы түрде келген Ермек Шынболатов актерлік мамандық бойынша арнайы білім алған. Теория мен тәжірибені қатар алып жүрген жас актер еңбекқорлығы мен жауапкершілігінің арқасында нарықта бірден сұранысқа ие болды. Оның әр рөлі – ізденістің, ішкі дайындықтың және кейіпкер психологиясын дәл беруге деген талпыныстың нәтижесі. Бүгінде Ермек отандық фильмдер мен түрлі форматтағы телехикаяларға жиі шақырылып, шығармашылық қоржынын толтырып келеді.
Актердің бағын жағып, көпшілікке кеңінен танытқан туынды – «Дәстүр» фильмі. Режиссер Қуаныш Бейсектің қоғамда үлкен резонанс тудырған, атышулы хоррор жанрындағы бұл картинасы көрермен назарын бірден өзіне аударды. Фильмдегі Ермектің образы – күрделі, психологиялық тұрғыдан терең әрі көрерменді бейжай қалдырмайтын кейіпкер. Ол экранда қорқыныш, ішкі қайшылық пен адам жанының қараңғы тұстарын шынайы жеткізе отырып, актерлік шеберлігінің жоғары деңгейін көрсете білді.
Фото. Кейіпкердің жеке мұрағатынан.
