Мұндай ұсынысты Санкт-Петербургте өтіп жатқан ТМД Парламентаралық Ассамблеясының жалпы отырысында Қазақстан Сенатының спикері Мәулен Әшімбаев айтты.
"Халықаралық ынтымақтастықты дамытуда тілдерді білу маңызды рөл атқаратыны жалпы мойындалған. Өкінішке орай, біз ТМД елдерінің тілдерін оқытуға әрдайым жеткілікті көңіл бөле бермейміз. Мәскеу мемлекеттік лингвистикалық университетінің Достастық елдерінің тілдері оқытылатын ТМД елдері мен көршілес елдердің тілдері мен мәдениеті кафедрасының тілдерді оқытуға бірегей мүмкіндігі бар. Біз өз тарапымыздан бұл кафедраға қазақ тілін оқытуға қажетті көмек көрсетуге дайынбыз. Менің ойымша басқа мамандандырылған жоғары оқу орындарында мұндай кафедраларды ашу мәселесін қарастыруға болар еді», - деді Мәулен Әшімбаев.
Сенат Төрағасы ТМД елдерінің тілдерін жоғары оқу орындарында оқытуды күшейту бойынша практикалық қадамдарды анықтау үшін ғалымдарды, сарапшыларды және мемлекеттік органдардың өкілдерін тарта отырып, ТМД ПАА аясында конференция өткізуді ұсынды. Мәулен Әшімбаевтың тағы бір бастамасы – Ассамблея аясында аймақ елдерінің шығармашылық және ғылыми зиялы қауымының қатысуымен форум өткізу. Мұндай көзқарас елдер арасындағы мәдени-гуманитарлық байланыстарды сақтауға және дамытуға ықпал етуі керек.
Төтенше жағдайлардың туындау қаупін ертерек ескерту және дәлірек болжау және төмендету бойынша, оның ішінде сейсмикалық қауіпсіздік саласындағы ынтымақтастықты нығайту мәселесі де өзекті.
"ТМД елдерінің аумағында көптеген сейсмикалық белсенді орындар бар. Сонымен бірге біздің елдерде бұл салада айтарлықтай ғылыми әлеует жинақталған, сейсмологиялық, геофизикалық және басқа да деректерге мониторинг жүргізілуде. Қауіпсіздік, жер сілкінісінің алдын алу бойынша бірлескен зерттеулер жүргізу керек" деп атап өтті Мәулен Әшімбаев.
Сондай-ақ сессия аясында Мәулен Әшімбаев Қырғызстан Жогорку Кенешінің Төрағасы Нұрланбек Шәкиевпен, Әзірбайжан Милли Мәжілісінің Төрағасы Сахиба Гафаровамен және Армения Ұлттық Жиналысының Төрағасы Ален Симонянмен кездесті. Тараптар бірлескен жобалардың жоспарын анықтап, заңнамалық саланы жаңғырту бойынша ұсыныстармен алмасты.