Қазақстан Президенті Қасым-Жомарт Тоқаев мұғалімдердің республикалық съезінде сөз сөйледі.
Тоқаев талқыланып жатқан мәселеге жеке тоқталды. Ол Қазақстанның зайырлы мемлекет екеніне тоқталды. Бұл қағида барлық салада, оның ішінде білім саласында да қатаң сақталуы тиіс.
«Мектеп, ең алдымен, балалардың білім алуға келетін оқу орны екенін әрқашан есте ұстауымыз керек. Ал діни сенімдер әр азаматтың таңдауы және жеке ісі. Елімізде діни сенім бостандығына заңмен кепілдік берілген. Бала өскенде өз таңдауын жасап, өзіндік дүниетанымын қалыптастырса дұрыс болар еді деп ойлаймын. Ең бастысы, дүниетанымы ашық, санасы таза, дәстүріне берік ұрпақ тәрбиелеу. «Зайырлылық» сөзінің мазмұны өте терең. Халқымыздың дүниетанымы туралы айтатын болсақ, зайырлылықты прагматизм, салауатты өмір салтын ұстану, дәстүрлі дінімізді қастерлеу, ұлттық сананы сақтау деп сипаттауға болады», - деді Тоқаев.
Бұған дейін Мәжіліс спикері Ерлан Қошанов Қазақстан Республикасының Конституциясы діни сенім бостандығын шектемейтінін атап өткен болатын. Бірақ ол мектептердің саяси және діни ағымдардың орталығына айналмауы керектігін қосты. Сондай-ақ, Мәжілістің тағы бір депутаты Айдарбек Хожаназаров Қазақстан мектептерінде хиджаб киюге қатысты пікірімен бөлісті.
Еске салайық, тамыз айының соңында Білім министрі Ғани Бейсембаев жекелеген азаматтардың мектептерде хиджаб киюге рұқсат беру туралы өтінішіне қатысты пікірін білдірген болатын.
Ал, құқық қорғаушы Олжас Біләлов мектептерде 13 мыңнан астам қыз хиджаб киетінін айтты.