Павлодар облысының басшысы Асайн Байханов Майқайың кеніші маңында автобустың шұңқырға құлауы салдарынан қаза тапқандар мен хабарсыз кеткендердің отбасыларына қандай көмек көрсетілетінін айтты.
Оның айтуынша, қаза тапқан және хабарсыз кеткен құтқарушылардың отбасыларына «Майкаинзолото» АҚ мен кәсіби әскерилендірілген авариялық-құтқару қызметінің орталық штабынан әр отбасына 4,5 миллион теңгеден материалдық көмек көрсетіледі.
Мемлекет қайтыс болғандардың отбасыларына асыраушысынан айырылуына байланысты әлеуметтік жәрдемақылар береді. «Қаза болған екі құтқарушының отбасына қайғырып көңіл айтамын», - деп жазды әкім өз парақшасында.
Ол «Майқайыңзолото» АҚ аумағында іздестіру-құтқару жұмыстары әлі де жалғасып жатқанын айтты. Оларға 116 адам мен 23 техника жұмылдырылған. Таңертең оқиға орнына Астана қаласының Төтенше жағдайлар департаментінің кинологтар тобы жетіп, дереу іздеу жұмыстарына кірісті.